నర్లాపూర్‌ వద్ద మొదటి లిప్టు మోటర్‌ను ప్రారంభించిన అధికారులు
ప్రజాపక్షం/నాగర్‌కర్నూల్‌ ప్రతినిధి తెలంగాణ సాగునీటి రంగంలో మరోఘట్టం ఆవిష్కృతమైంది. పాలమూరు- రంగారెడ్డి భాగంగా నర్లాపూర్‌ పంప్‌ హౌస్‌ వద్ద మొదటి పంపు డ్రైరన్‌ విజయవంతమైంది. తొమ్మిది మోటర్లలో మొదటి మోటర్‌ డ్రైరన్‌ను ఇంజినీర్లు సక్సెస్‌ఫుల్‌గా నిర్వహించారు. డ్రైరన్‌ను ఆదివారం ఇరిగేషన్‌ ముఖ్య కార్యదర్శి రంజిత్‌ కుమార్‌ ఈఎస్‌ సి మురళీధర్‌రావు ప్రారంభించారు. ఈసందర్భంగా అధికారులు మాట్లాడుతూ ఉమ్మడి మహబూబ్‌నగర్‌,రంగారెడ్డి జిల్లాలకు ఆగు,తాగునీరు అందించేందుకు తెలంగాణ ప్రభుత్వం ప్రతిష్టాత్మకంగా చేపట్టిన పాలమూరు – రంగారెడ్డి ఎత్తిపోతల పథకం కీలక దశకు చేరుకున్నందన్నారు.నార్లాపూర్‌ పంపుహౌజ్‌లోని మొదటి పంపు డ్రైరన్‌కు విజయవంతంగా పూర్తియిందని,త్వరలో వెట్న్‌క్రు సిద్దమవుతున్నామని అధికారులు ధీమా వ్యక్తం చేశారు.అనంతరం సిఎం కెసిఆర్‌ చేతుల మీదుగా నీటిని విడుదల చేస్తామన్నారు. పాలమూరు పథకం మొదటి పంపు డ్రైరన్‌ విజయవంతం కావడంతో ఇరిగేషన్‌ ముఖ్య కార్యదర్శి రంజిత్‌కుమార్‌ అధికారులను అభఙనందించారు.ఈ కార్యక్రమంలో పాలమూరు – రంగారెడ్డి పథకం అధికారులు, సిబ్బంది తదితరులు పాల్గొన్నారు. పిఆర్‌ఎల్‌ఐసి పథకంలో భాగంగా శ్రీశైలం రిజర్వాయర్‌ బ్యాక్‌ వాటర్‌ నుంచి మొత్తంగా ఆరు దశల్లో నీటిని ఎత్తి పోయాల్సి ఉంది. అందుకు సంబంధించి ప్రభుత్వం పనులను మొత్తంగా 21 ప్యాకేజీలుగా విభజించగా.. అందులో నార్లాపూర్‌ నుంచి ఉద్దండాపూర్‌ వరకు 18 ప్యాకేజీల పనులను చేపట్టింది. అందులో 4 పంప్‌హౌజ్‌లను నిర్మించాల్సి ఉంది. ఇప్పటికే నార్లాపూర్‌, ఏదుల, వట్టెంల పంప్‌హౌజ్‌లు తుదిదశకు చేరుకొన్నాయి. ఉద్దండాపూర్‌ పంప్‌హౌజ్‌ పనులు ముమ్మరంగా కొనసాగుతున్నాయి. నార్లాపూర్‌ పంప్‌హౌజ్‌లో 145 మెగావాట్ల సామర్థ్యమున్న 9 పంపులను ఏర్పాటు చేయాల్సి ఉంది. ఏదుల, వట్టెంల పంప్‌హౌజ్‌లలో 9+1 చొప్పున పంపులను, ఉద్దండాపూర్‌లో 4+1 పంపులను అమర్చాల్సి ఉంది. ఇప్పటికే నార్లాపూర్‌ పంప్‌హౌజ్‌లో 2, ఏదులలో 3, వట్టెంలో 3 పంపుల అమరిక పూర్తిగా సిద్ధమయ్యాయి. ఈ నేపథ్యంలో నార్లాపుర్‌ పంప్‌హౌజ్‌లో అమర్చిన మొదటి పంప్‌ డ్రైరన్‌ను నేడు నిర్వహించారు. పాలమూరు ప్రాజెక్టు మొదటి పంప్‌ డ్రైరన్‌కు సక్సెస్‌ కావడంతో ఇక్కడి రైతులు సంతోషం వ్యక్తంచేస్తున్నారు. త్వరలోనే తమ బీడు భూముల్లో కృష్ణమ్మ పరుగులు తీస్తుందని, ప్రాజెక్టు పరిధిలోని ప్రాంతాలు సస్యశ్యామలం అవుతాయని ఆనందపడుతున్నారు.
