అత్యుత్తమ మున్సిపాలిటీలకు అవార్డులు : మంత్రి కెటిఆర్‌
ప్రజాపక్షం/హైదరాబాద్‌ రాష్ట్రంలోని పురపాలికల్లో గ్రీన్‌ కవర్‌ పెంపును మరింత ప్రోత్సహించేందుకు ‘గ్రీన్‌స్పేస్‌ ఇండెక్స్‌’ పేరుతో కొత్త కార్యక్రమాన్ని ప్రారంభిస్తున్నామని మున్సిపల్‌ శాఖ మంత్రి కెటి.రామారావు వెల్లడించారు. ‘గ్రీన్‌స్పేస్‌ ఇండెక్స్‌’ కార్యక్రమంలో అత్యుత్తమంగా నిలిచిన మున్సిపాలిటీలకు ప్రతి సంవత్సరం అవార్డులను అందజేస్తామన్నారు. ఒక పట్టణంలో ఉన్న మొత్తం గ్రీన్‌ కవర్‌కు 85 శాతం వెయిటేజీ, మరో ఐదు శాతం గ్రీన్‌ కవర్‌ పెంచడంలో అవలంబించిన ఇన్నోవేషన్‌ పద్ధతులకు, మరో పది శాతం వివిధ డిజైన్లతో ఆకుట్టకునేలా చేపట్టే ప్లాంటేషన్‌కు వెయిటేజీ ఇచ్చి ఉత్తమ పురపాలికలను ఎంపిక చేస్తామని వివరించారు. ఈ మేరకు మంత్రి కెటిఆర్‌ ఆదివారం ఒక ప్రకటన విడుదల చేశారు. స్థూలంగా పురపాలిక మొత్తానికి అవార్డుతో పాటు అత్యధిక అర్బన్‌ గ్రీన్‌ స్పేస్‌, బెస్ట్‌ డిస్ట్ట్రిబ్యూషన్‌ ఆఫ్‌ అర్బన్‌ గ్రీన్‌ స్పేస్‌, అర్బన్‌ గ్రీన్‌ స్పేస్‌ పర్‌ క్యాపిట, రోడ్‌ సైడ్‌ మొక్కల పెంపకం వంటి ఇతర కేటగిరీలలో అవార్డులను ఇవ్వనున్నట్టు తెలిపారు. ఈ కార్యక్రమాన్ని ఈ సంవత్సరం మొదలై మరో నాలుగేళ్ల పాటు కొనసాగించాలని భావిస్తున్నామని, ఆ లోపలే ప్రజలకు అవసరమైన గ్రీన్‌ కవర్‌ను అన్ని పురపాలికల్లో ఏర్పాటు చేయాలన్నదే ఈ కార్యక్రమ లక్ష్యమన్నారు. పట్టణాల్లో మొక్కల పెంపకాన్ని, పార్కుల అభివృద్ధి, ఇతర హరిత కవర్‌ పెరిగే కార్యక్రమాలను ప్రోత్సహించేందుకే ఈ కార్యక్రమాన్ని ప్రారంభించామన్నారు. కేంద్ర ప్రభుత్వ హౌసింగ్‌, అర్బన్‌ ఎఫైర్స్‌ శాఖ పట్టణాల్లో గ్రీన్‌కవర్‌, ఓపెన్‌ స్పేస్‌లపై రూపొందించిన మార్గదర్శకాలకు అనుగుణంగా కార్యక్రమం ఉంటుందన్నారు. పట్టణాల్లో ప్రజల జీవన ప్రమాణాలను పెంపొందించేందుకు అత్యవసరమైన గ్రీనరీని పెంచడంలో వినూత్నమైన కార్యక్రమాలను తీసుకోవాల్సిన అవసరం ఉన్నదని, ఆ దిశగా రాష్ట్ర ప్రభుత్వం ముందు వరుసలో ఉంటుందన్నారు. ప్రస్తుతం ఉన్న గ్రీన్‌ కవర్‌ను ముదించేందుకు జిఐఎస్‌ వినియోగం, ఉపగ్రహ చిత్రాలు, ఫొటోగ్రఫీ, వీడియోగ్రఫీ, జియోట్యాగింగ్‌ వంటి పద్ధతుల ద్వారా రికార్డు చేసి రానున్న సంవత్సరం తర్వాత ఏ మేరకు ఆయా పట్టణాలకు గ్రీన్‌ కవర్‌ పెరిగిందనే అంశాన్ని తిరిగి ముదింపు చేస్తామని వివరించారు. ఇలాంటి పోటీతత్వం ద్వారా గ్రీన్‌ కవర్‌ పెంపొంది మరింత ఎక్కువ స్ఫూర్తితో కార్యక్రమాలను నిర్వహిస్తారని పేర్కొన్నారు. మొక్కల పెంపకంలో వినూత్న డిజైన్లు, రోడ్‌సైడ్‌ గ్రీనరీ పెంపకం, ఇంటి మొక్కల పెంపకం వంటి అంశాలకు ప్రత్యేక ప్రాధాన్యత ఇస్తున్నామని మంత్రి కెటిఆర్‌ అన్నారు.
పట్టణాల్లో కొత్తగా గ్రీన్‌స్పేస్‌ ఇండెక్స్‌
RELATED ARTICLES
