‘నీటిపారుదల శాఖ పునర్వ్యవస్థీకరణ’పై

నేడు సిఎం కీలక నిర్ణయం
నేడు, రేపు కెసిఆర్‌ సమీక్షలు
ప్రజాపక్షం/హైదరాబాద్‌ ‘నీటిపారుదల శాఖ పునర్వ్యవస్థీకరణ’పై ముఖ్యమంత్రి కె.చంద్రశేఖర్‌రావు సోమవారం కీలకమైన నిర్ణయం తీసుకోనున్నారు. నీటి పారుదల శాఖ ముఖ్య కార్యదర్శి రజత్‌కుమార్‌, సిఎం కార్యదర్శి స్మితాసభర్వాల్‌ రెండురోజుల పాటు ‘నీటిపారుదల శాఖ పునర్వ్యవస్థీకరణ’పై వర్క్‌షాపు నిర్వహించి ముసాయిదా రూపొందించారు. ఈ ముసాయిదాను సోమవారం ముఖ్యమంత్రి కెసిఆర్‌కు సమర్పిస్తారని, ముసాయిదాపై సమగ్రంగా చర్చించి తుది నిర్ణయం తీసుకుంటారని ముఖ్యమంత్రి కార్యాలయం వెల్లడించింది. ఇందు కోసం ఈ సమీక్షలో నీటి పారుదల శాఖ ముఖ్య కార్యదర్శి, సిఎం కార్యదర్శి, ఇఎన్‌సిలు, సిఇలు పాల్గొంటారని తెలియజేసింది. రాష్ట్రంలోని రెండు కీలకమైన ఇంజనీరింగ్‌ విభాగాల ముఖ్యులతో ముఖ్యమంత్రి కె.చంద్రశేఖర్‌రావు సోమ, మంగళవారాల్లో విస్తృతస్థాయి సమీక్ష సమావేశాలు నిర్వహించనున్నారు. సోమవారం మధ్యాహ్నం రెండు గంటల నుంచి నీటి పారుదల శాఖ, మంగళవారం మధ్యాహ్నం రెండు గంటల నుంచి రోడ్లు, భవనాల శాఖ మంత్రులు, ముఖ్య అధికారులతో సమావేశం కానున్నట్లు ముఖ్యమంత్రి కార్యాలయం ఆదివారం తెలియజేసింది. “రాష్ట్రంలో సాగునీటి రంగానికి ప్రాధాన్యత పెరిగింది. సాగునీటి శాఖ ప్రాధాన్యతను గుర్తించి ఆ శాఖను పునర్వ్యవస్థీకరించి బలోపేతం చేయాలి. సాగునీటి పారుదల విభాగాలన్నీ ఒకే గొడుకు కిందికి రావాలి. తద్వారా పర్యవేక్షణ పటిష్టంగా ఉంటుందని, ఇందు కోసం ముసాయిదా తయారు చేయాలి” అని గతవారం జరిగిన సమీక్షలో ముఖ్యమంత్రి అధికారులను ఆదేశించారని సిఎంఓ తెలిపింది. కాగా తెలంగాణ సచివాలయం నూతన భవన సముదాయం నిర్మాణంపై మంగళవారం మధ్యాహ్నం ముఖ్యమంత్రి సమీక్ష నిర్వహిస్తారు. రాష్ట్ర పరిపాలనా కేంద్రమైన సెక్రటేరియట్‌ తెలంగాణ ప్రతిష్ట, వైభవానికి ప్రతీకగా ఉండాలనే ముఖ్యమంత్రి కెసి ఆర్‌ భావించారు. దీనికి సంబంధించిన డిజైన్లను కూడా పరిశీలించారు. మంగళవారం జరిగే సమీక్షలో డిజైన్లను పరిశీలించి అనంతరం వాటిని మంత్రివర్గంలో చర్చించి, తుది నిర్ణయం తీసుకుంటారని, ఆ తర్వాత టెండర్లు పిలిచి, భవన సముదాయ నిర్మాణం ప్రారంభిస్తారని సిఎంఓ తెలిపింది. రోడ్లు, భవనాల శాఖ సమీక్షలో మంత్రి వేముల ప్రశాంత్‌రెడ్డి, ముఖ్య కార్యదర్శి, ఇంజనీరింగ్‌ అధికారులు, తమిళనాడుకు చెందిన ఆర్కిటెక్టులు ఆస్కార్‌, పొన్ని తదితరులు పాల్గొంటారని సిఎంఓ వివరించింది.