న్యూఢిల్లీ : భారత్‌ బయోటెక్‌ సంస్థ తయారు చేసిన కరోనా నాసికా టీకాను కేంద్రం ఆవిష్కరించింది. కేంద్ర వైద్య శాఖమంత్రి మన్‌సుఖ్‌ మాండవీయ, కేంద్ర సైన్స్‌ అండ్‌ టెక్నాలజీ మంత్రి జితేంద్ర సింగ్‌ కలిసి ఈ టీకాను గురువారం ఢిల్లీలో ప్రారంభించారు. ఈ కార్యక్రమం లో భారత్‌ బయోటెక్‌ వ్యవస్థాపకులు కృష్ణ ఎల్ల, సుచిత్ర ఎల్ల పాల్గొన్నారు. ‘ఈ టీకా పంపిణీ చాలా సులువు. సూది అవసరం లేదు. ఈ టీకా తో ఐజిజి, ఐజిఎ, టీ-సెల్‌ అనే మూడు రకాల ప్రతిస్పందనలు వస్తాయి. ప్రపంచంలో మరే ఇతర వ్యాక్సిన్‌తో ఇది సాధ్యం కాదు‘ అని కృష్ణ ఎల్ల వివరించారు. ఇన్‌కొవాక్‌ పేరుతో భారత్‌ బయోటెక్‌ సంస్థ ఈ టీకాను అభివృద్ధి చేసింది. గతేడాది నవంబర్‌లోనే ఈ టీకా వినియోగానికి డ్రగ్‌ కంట్రోలర్‌ జనరల్‌ ఆఫ్‌ ఇండియా(డిసిజిఐ) అనుమతులు ఇచ్చింది. నాసికా టీకాను 18 ఏళ్లు పైబడినవారికి బూస్టర్‌ డోసుగా అందించేందుకు పచ్చజెండా ఊపింది. కొవిన్‌ ప్లాట్‌ఫామ్‌లోనూ ఈ టీకాను చేర్చారు. ఇకపై ప్రజలందరికీ ఈ టీకా అందుబాటులో ఉండనుంది. ఇప్పటికే కొవాగ్జిన్‌ లేదా కొవిషీల్డ్‌ వ్యాక్సిన్‌ రెండు డోసులు తీసుకున్నవారు ఇన్‌కొవాక్‌ నాసికా టీకాను బూస్టర్‌గా పొందొచ్చు. ‘బిబివి154’గా పిలిచే ఈ నాసికా టీకా ‘ఇన్‌కొవాక్‌’ బ్రాండ్‌ పేరుతో మార్కెట్లో లభ్యమవుతుంది. కరోనాపై పోరులో ఇది చాలా సమర్థంగా పనిచేస్తున్నట్లు ప్రయోగ పరీక్షలో తేలింది. ప్రపంచంలో రెండు డోసుల్లో ముక్కు ద్వారా తీసుకునే మొట్టమొదటి ప్రాథమిక టీకా కూడా ఇదేనని భారత్‌ బయోటెక్‌ వెల్లడించింది. సింగిల్‌ డోసు టీకా ధరను రూ.800 (పన్నులు అదనం)గా నిర్ణయించినట్లు భారత్‌ బయోటెక్‌ గతంలో ప్రకటించింది. భారీ స్థాయిలో సేకరించే కేంద్ర, రాష్ట్ర ప్రభుత్వాలకు మాత్రం రూ.320కే ఇవ్వనున్నట్లు పేర్కొంది. ఈ టీకా వైరస్‌ శరీరంలోకి ప్రవేశించే మార్గంలోనే (ముక్కులోనే) రోగనిరోధక ప్రతిస్పందనలు కలిగిస్తుంది. తద్వారా వైరస్‌ బారినపడకుండా కాపాడుకోవడమే కాకుండా ఇన్‌ఫెక్షన్‌, సంక్రమణ నుంచి పూర్తి రక్షణ పొందవచ్చు. ఈ నాజల్‌ వ్యాక్సిన్‌ను ముక్కు ద్వారా తీసుకోవాలి. ప్రస్తుతం దేశంలో ఉన్న సూదితో వేసే వ్యాక్సిన్‌లకు బదులుగా చుక్కల ద్వారా ముక్కులో వేసే కొత్త రకం వ్యాక్సిన్‌ను అందుబాటులోకి తెచ్చారు.
నాసికా కొవిడ్‌ చుక్కలు ఆవిష్కరణ
RELATED ARTICLES
