బిఆర్‌ఎస్‌ ఆవిర్భావం
మంత్రి కెటిఆర్‌
సిరిసిల్ల: గోల్‌మాల్‌ గుజరాత్‌ కాదు.. గోల్డెన్‌ తెలంగాణ నమూనాను దేశానికి పరిచయం చేసేందుకు బిఆర్‌ఎస్‌ ఆవిర్భవించిందని బిఆర్‌ఎస్‌ కార్యనిర్వాహక అధ్యక్షుడు, మంత్రి కెటిఆర్‌ అన్నారు. జాతీయ రాజకీయాల్లోకి ముఖ్యమంత్రి కె. చంద్రశేఖర్‌రావు రావడం చారిత్రక అనివార్యమని చెప్పారు. సిరిసిల్లలోని రెండో బైపాస్‌ రోడ్డులో నిర్వహించిన భారాస నియోజకవర్గ ప్లీనరీలో ఆయన మాట్లాడారు. టిఆర్‌ఎస్‌ పేరు బిఆర్‌ఎస్‌గా మారిందే తప్ప.. డిఎన్‌ఎ, జెండా, అజెండా మారలేదని చెప్పారు. బిజెపి, కాంగ్రెస్‌ పార్టీలు అధికారం కోసం అర్రులు చాస్తున్నాయని కెటిఆర్‌ విమర్శించారు. ‘తెలంగాణ రాష్ట్ర సాధనకు ఆనాటి టిఆర్‌ఎస్‌.. ఇప్పటి బిఆర్‌ఎస్‌ ఆవిర్భవించి ఈనెల 27కు 22 ఏళ్లు పూర్తవుతుంది. నాడు కెసిఆర్‌కు పేరు, ప్రతిష్ఠ, డబ్బు, మీడియా బలం లేదు. కేవలం ప్రజలకు ఉన్న విశ్వాసమే.. పార్టీని ఈ స్థాయికి తీసుకొచ్చింది. ఉద్యమం నుంచి తప్పుకొంటే రాళ్లతో కొట్టండి అని కెసిఆర్‌ ఆనాడు చెప్పారు. ఆంధ్రప్రదేశ్‌ నుంచి వెళ్తున్నా.. తెలంగాణతో తిరిగి వస్తానని
ధైర్యంతో చెప్పిన గొప్ప వ్యక్తి ఆయన. పోరాడి రాష్ట్రాన్ని సాధించిన వారికే అధికారం కట్టబెడితే అభివృద్ధి సాధ్యమవుతుందని ప్రజలు ఓట్లేశారు. ఇప్పుడు సిరిసిల్ల ఎక్కడి నుంచి ఏ స్థాయికి అభివృద్ధి చెందిందో మీరే ఆలోచించండి. ఒకనాడు డిగ్రీ కళాశాలకు కూడా నోచుకోని సిరిసిల్లలో ఇవాళ మెడికల్‌ కాలేజీ, ఇంజనీరింగ్‌ ,ప్రైవేటు యూనివర్సిటీ ఏర్పాటు చేసుకున్నామంటే ఏ స్థాయిలో అభివృద్ధి జరిగిందో అర్థం చేసుకోవాలి. పక్క నియోజకవర్గాలు, ప్రతిపక్షాలు అసూయ పడే విధంగా సిరిసిల్లను అభివృద్ధి చేసుకుంటున్నాం. ఇప్పుడు అభివృద్ధి చెందిన తెలంగాణ మోడల్‌ను దేశం మొత్తం అమలు చేయడమే మా పార్టీ ప్రధాన లక్ష్యం. ప్రధాని మోడీ చేసిన గోల్‌మాల్‌ను దేశమంతటికీ వివరించాలి. అబ్‌ కీ బార్‌ కిసాన్‌ సర్కార్‌.. అని మహారాష్ట్ర రైతులు గర్జిస్తున్నారు. ప్రజలు బిజెపి, కాంగ్రెస్‌ను కనుమరుగు చేసే రోజు త్వరలోనే వస్తుంది” అని కెటిఆర్‌ అన్నారు.
దేశానికి గోల్డెన్‌ తెలంగాణ నమూనాపరిచయం చేసేందుకే…
RELATED ARTICLES
