ఇండస్ట్రీ, సర్వీస్‌ రంగాల్లో విస్తరించే సత్తా గల నగరం
‘ఫోర్త్‌ సిటీ’ విజన్‌ అద్భుతం
ముఖ్యమంత్రి రేవంత్‌రెడ్డితో ఫాక్స్‌కాన్‌ ఛైర్మన్‌ యంగ్‌ లియూ
ప్రజాపక్షం/హైదరాబాద్‌
ఇండస్ట్రీ, సర్వీస్‌ సెక్టార్లతో పాటు అన్ని రంగాల్లో విస్తరించే సత్తా హైదరాబాద్‌ నగరానికి ఉందని, త్వరలోనే తన బృందంతో కలిసి హైదరాబాద్‌ నగరాన్ని సందర్శిస్తానని అంతర్జాతీయ దిగ్గజ పారిశ్రామిక సంస్థ ఫాక్స్‌కాన్‌ ఛైర్మన్‌ యాంగ్‌ లియూ చెప్పారు. ఫాక్స్‌ కాన్‌ ఛైర్మన్‌ యాంగ్‌ లియూ నేతృత్వంలోని ఫాక్స్‌కాన్‌ ప్రతినిధి బృందం ఢిల్లీలో ముఖ్యమంత్రి రేవంత్‌రెడ్డితో ఆయన అధికారిక నివాసంలో శుక్రవారం ఉదయం సమావేశమైంది. హైదరాబాద్‌ నగరానికి ఉన్న చరిత్ర, పారిశ్రామిక సంస్థల విస్తరణకు ఉన్న అనుకూలత, అద్భుతమైన వాతావరణ పరిస్థితులను ముఖ్యమంత్రి రేవంత్‌రెడ్డి ఫాక్స్‌కాన్‌ బృందానికి వివరించారు. ప్రభుత్వాలు మారినా పారిశ్రామిక అభివృద్ధిలో వైరుధ్యాలు లేకపోవడంతోనే హైదరాబాద్‌ వేగంగా పురోగతి చెందుతోందని, ఆ అభివృద్ధిని మరింతగా పరుగులు పెట్టించేందుకే తాము ప్రస్తుత ప్రపంచ అవసరాలకు తగినట్లు ఫ్యూచర్‌ సిటీ పేరుతో నాలుగో
నగరానికి (ఫోర్త్‌ సిటీ) రూపకల్పన చేస్తున్నామని ముఖ్యమంత్రి రేవంత్‌రెడ్డి వివరించారు. ఫోర్త్‌ సిటీలో విద్యా, వైద్యం, క్రీడా, ఎలక్ట్రానిక్స్‌, ఎలక్ట్రికల్‌, స్కిల్‌ డెవలప్‌మెంట్‌ ఇలా బహుముఖంగా అభివృద్ధి చేయనున్నామని చెప్పారు. ప్రస్తుత ప్రపంచానికి అవసరమైన స్కిల్స్‌కు యువతకు అందించేందుకు యంగ్‌ ఇండియా స్కిల్‌ డెవలప్‌మెంట్‌ యూనివర్సిటీని ప్రారంభిస్తున్నామన్నారు. నవతరం పరిశ్రమల అవసరాలు, వాటికి అవసరమైన నైపుణ్యాలు, భవిష్యత్తులో వివిధ పరిశ్రమల అవసరాలు తీర్చే మానవ వనరులను అందించేందుకు అవసరమైన సిలబస్‌ రూపకల్పనలో ప్రముఖ పారిశ్రామికవేత్తలను భాగస్వాములను చేస్తున్నట్లు తెలిపారు. ఫోర్త్‌ సిటీలో ఫాక్స్‌ కాన్‌ సంస్థ పరిశ్రమలు పెట్టేందుకు అవసరమైన అన్ని అనుమతులు ఇవ్వడంతో పాటు అవసరమైన మద్దతు అందజేస్తామని ముఖ్యమంత్రి రేవంత్‌రెడ్డి ఫాక్స్‌కాన్‌ ఛైర్మన్‌ యాంగ్‌ లియూకి హామీ ఇచ్చారు. ఫోర్త్‌ సిటీలో పెట్టుబడులు పెట్టాలని ఆహ్వానించారు. పారిశ్రామిక అభివృద్ధికి ముఖ్యమంత్రి రేవంత్‌రెడ్డి నేతృత్వంలోని ప్రభుత్వం తీసుకుంటున్న చర్యలు, అందిస్తున్న ప్రోత్సాహాకాలు, ఇటీవల ముఖ్యమంత్రి రేవంత్‌రెడ్డి నేతృత్వంలో తమ బృందం అమెరికా, దక్షిణ కొరియాలో పర్యటించి దిగ్గజ పారిశ్రామిక సంస్థలతో జరిపిన చర్చలు, చేసుకున్న ఒప్పందాలను రాష్ట్ర ఐటి, పరిశ్రమల శాఖ మంత్రి దుద్దిళ్ళ శ్రీధర్‌బాబు ఛైర్మన్‌ యాంగ్‌ లియూకి వివరించారు. ఫోర్త్‌ సిటీ రూపకల్పనలో ముఖ్యమంత్రి దార్శనికత, పారిశ్రామిక అనుకూల విధానాలు తనను ఎంతగానో ఆకట్టుకున్నాయని ఫాక్స్‌కాన్‌ ఛైర్మన్‌ యాంగ్‌ లియూ అన్నారు. ఫోర్త్‌ సిటీతో పాటు పారిశ్రామిక అనుకూల విధానాల్లో రాష్ట్రం విజన్‌ అద్భుతంగా ఉందంటూ యాంగ్‌ లియూ ముఖ్యమంత్రి రేవంత్‌రెడ్డిని అభినందించారు. తాను సాధ్యమైనంత త్వరలోనే హైదరాబాద్‌ను సందర్శిస్తానని తెలిపారు. అంతకుముందే తమ చీఫ్‌ క్యాంపస్‌ ఆపరేషన్స్‌ ఆఫీసర్‌ క్యాథీ యాంగ్‌, సంస్థ భారత దేశ ప్రతినిధి వీ లీ నేతృత్వంలోని బృందం హైదరాబాద్‌ వస్తుందని ఆయన చెప్పారు. భేటీలో రాష్ట్ర ప్రభుత్వ ప్రత్యేక కార్యదర్శి జయేష్‌ రంజన్‌, ప్రత్యేక కార్యదర్శి డాక్టర్‌ విష్ణువర్ధన్‌రెడ్డి, సిఎం ప్రత్యేక కార్యదర్శి అజిత్‌రెడ్డి, ఎలక్ట్రానిక్స్‌, సెమీకండక్టర్స్‌ అండ్‌ ఎనర్జీ స్టోరేజ్‌ డాక్టర్‌ ఎస్‌కె.శర్మ, ఫాక్స్‌కాన్‌ నుంచి సంస్థ ఎస్‌బిజి ప్రెసిడెంట్‌ బాబ్‌ చెన్‌, సిబిజి జిఎం జొ వూ, చీఫ్‌ క్యాంపస్‌ ఆపరేషన్స్‌ ఆఫీసర్‌ క్యాథీ యాంగ్‌, సిబిజి డిప్యూటీ జిఎం సూ, షొ కూ, సి-గ్రూప్‌ మేనేజర్‌ సైమన్‌ సంగ్‌, సంస్థ భారత దేశ ప్రతినిధి వీ లీ తదితరులు పాల్గొన్నారు.
త్వరలోనే హైదరాబాద్‌కు ఫాక్స్‌కాన్‌ బృందం
RELATED ARTICLES
