‘మూసీ’ నిర్వాసితులకు‘డబుల్‌ బెడ్‌’ ఇళ్లు
ప్రజాపక్షం / హైదరాబాద్‌
మూసీ రివర్‌ ఫ్రంట్‌ ప్రాజెక్ట్‌ అభివృద్ధిలో భాగంగా నిర్వాసితులయ్యే కుటుంబాలకు 16 వేల డబుల్‌ బెడ్‌రూమ్‌ గృహాలను కేటాయిస్తూ ప్రభుత్వం ఉత్తర్వులు జారీ చేసింది. మూసీ రివర్‌ బెడ్‌ (నదీ గర్భం), బఫర్‌ జోన్‌లో ఉన్న నిర్మాణాలకు పునరావాసం కల్పించేందుకు వీటిని ఉపయోగిస్తారు. ఇప్పటికే అధికారులు చేపట్టిన సర్వే ప్రకారం 10,200 మంది ని నిర్వాసితులుగా గుర్తించారు. రంగారెడ్డి, హైదరాబాద్‌, మేడ్చల్‌ మూడు జిల్లాల కలెక్టర్ల ఆధ్వర్యంలో అధికారుల బృందాలు బుధవారం ఇంటింటికి వెళ్లి అక్కడున్న ప్రజలకు ఎక్కడెక్కడ డబుల్‌ బెడ్‌ రూమ్‌ ఇళ్ల ను కేటాయించారో తెలియజేస్తారు. ముందుగా రివర్‌ బెడ్‌ లో ఆక్రమణలో ఉన్న 1600 ఇళ్లను తొలగించి అక్కడ ఉన్న వారిని తరలిస్తారు. మూసీ బఫర్‌ జోన్‌లో నివసించే వ్యక్తులు, నిర్మాణాలకు ఆర్‌ఎఫ్‌సిటిఎల్‌ఎఆర్‌ఆర్‌ చట్టం ప్రకారం పరిహారం చెల్లిస్తారు. నిర్మాణ ఖర్చుతో పాటు, వారికి పట్టా ఉంటే భూమి విలువను పరిహారంగా చెల్లిస్తారు. డబుల్‌ బెడ్‌రూమ్‌ ఇల్లు కూడా కేటాయిస్తారు. మూసీ బాధిత ప్రజలందరికీ చట్ట ప్రకారం పునరావాసం కల్పిస్తామని ముఖ్యమంత్రి రేవంత్‌ రెడ్డి ఇప్పటికే భరోసా ఇచ్చారు. ఇటీవల మంత్రి పొన్నం ప్రభాకర్‌ కూడా అధికారులతో కలిసి మూసీ పరివాహక ప్రాంతంలో పర్యటించారు. నిర్వాసితుల ను సంప్రదించి పునరావాసం కల్పించే ప్రక్రియను కలెక్టర్లు బుధవారం ప్రారంభిస్తారని ముఖ్యమంత్రి కార్యాలయం తెలియజేసింది. అక్రమిత చెరువులు, నాలాలతో పాటు, మూసీ పరివాహక ప్రాంతాల పరిధిలో నివసించే అర్హులైన పేదల వివరాలు సేకరించాలని అధికారులను సిఎం ఆదేశించారు. అర్హులైన పేదలకు డబుల్‌బెడ్‌రూమ్‌ లేదా ఇతర ప్రత్యామ్నాయం చూపి వారికి భరోసా ఇచ్చే ప్రయత్నం చేయాలన్నారు. ఔటర్‌ లోపల ఉన్న చెరువుల పరిరక్షణకు చర్యలు తీసుకోవాలని అధికారులకు సిఎం స్పష్టం చేశారు. ఆక్రమణలకు గురి కాకుండా పర్యవేక్షించేందుకు చెరువుల వద్ద సిసి కెమెరాలను ఏర్పాటు చేయాలని సూచించారు. కాగా ఇటీవల మంత్రి పొన్నం ప్రభాకర్‌ కూడా అధికారులతో కలిసి మూసీ పరివాహక ప్రాంతంలో పర్యటించారు. నిర్వాసితులను సంప్రదించి, పునరావాసం కల్పించే ప్రక్రియను కలెక్టర్లు బుధవారం ప్రారంభించనున్నారు.
