హైదరాబాద్‌లో క్రిస్టియన్‌ భవన్‌ : సిఎం కెసిఆర్
ఎల్‌బి స్టేడియంలో ప్రభుత్వం నిర్వహించిన వేడుకల్లో పాల్గొన్న సిఎం
ప్రజాపక్షం / హైదరాబాద్‌ : క్రిస్మస్‌, రంజాన్‌ వేడుకలను తెలంగాణలో అధికారికంగా నిర్వహిస్తున్నామని, హైదరాబాద్‌లో క్రిస్టియన్‌ భవన్‌ను నిర్మిస్తామని రాష్ట్ర ముఖ్యమంత్రి కె.చంద్రశేఖర్‌ చెప్పారు. రాష్ట్ర ప్రభుత్వ ఆధ్వర్యంలో ఎల్‌బి స్టేడియంలో శుక్రవారం రాత్రి నిర్వహించిన క్రిస్మస్‌ వేడుకల్లో ముఖ్యమంత్రి పాల్గొన్నారు. ఈ సందర్భంగా సిఎం కెసిఆర్ కేక్‌ కట్‌ చేశారు. క్రిస్టియన్‌ సోదర, సోదరీమణులకు క్రిస్మస్‌ కానుకలు అందజేశారు. అందరికీ పండుగ శుభాకాంక్షలు తెలిపారు. అనంతరం సిఎం కెసిఆర్ మాట్లాడుతూ దేశంలోనే క్రిస్మస్‌ వేడుకలను అధికారికంగా నిర్వహిస్తున్న ఏకైక రాష్ట్రం తెలంగాణ అని చెప్పారు. భగవంతుని దయవల్ల మనం కోరుకున్న రాష్ట్రం సిద్ధించిందన్నా రు. మైనార్టీల సంక్షేమం కోసం రూ.2 వేల కోట్లు కేటాయించామని తెలిపారు. మైనార్టీ రెసిడెన్షియల్‌ స్కూళ్లు గొప్ప ఫలితాలు ఇస్తున్నాయన్నారు. మంచి మెజార్టీతో టిఆర్‌ఎస్‌ రెండోసారి అధికారంలోకి వచ్చిందని, దేశం లో ఏ రాష్ట్రంలో లేని విధంగా ఆర్థికంగా ప్రగతి సాధిస్తోందన్నారు. వేడుకలకు హోంమంత్రి మహ్మద్‌ మహమూద్‌ అలీ, ఎమ్మెల్యే తలసాని శ్రీనివాస్‌, మాజీ హోంమంత్రి నాయిని నర్సింహారెడ్డి, సిఎస్‌ ఎస్‌.కె.జోషితో పాటు పలువురు ఎంఎల్‌ఎలు, ప్రముఖులు హాజరయ్యారు.
