2026 ఆగస్టులోగా ప్రాజెక్టును పూర్తిచేస్తాం
15 ప్రాజెక్ట్‌ పంప్‌ హౌస్‌లను ప్రారంభించనున్న సిఎం
నీటిపారుదల శాఖ మంత్రి ఉత్తమ్‌ కుమార్‌ రెడ్డి వెల్లడి
సీతారామ ప్రాజెక్ట్‌ ట్రయల్‌ రన్‌ ప్రారంభించిన మంత్రులు
ప్రజాపక్షం / హైదరాబాద్‌/ఖమ్మం
సీతారామ ప్రాజెక్ట్‌ ట్రయల్‌ రన్‌ సక్సెస్‌ అయింది. ఈ లిఫ్ట్‌ ఇరిగేషన్‌ ప్రాజెక్టు పరిధిలోని మూడు కీలకమైన పంప్‌హౌస్‌లను రాష్ట్ర మంత్రులు ఎన్‌ ఉత్తమ్‌ కుమార్‌రెడ్డి, తుమ్మల నాగేశ్వరరావు, పొంగులేటి శ్రీనివాస్‌రెడ్డి ఆదివారం ట్రయన్‌ రన్‌ను నిర్వహించి పరిశీలించారు. ఈనెల 15న ముఖ్యమంత్రి రేవంత్‌రెడ్డి చేతుల మీదుగా ఈ ప్రాజెక్టు అధికారికంగా ప్రారంభోత్సవం చేయనున్న నేపథ్యంలో ఆదివారం నాడు భద్రాద్రి కొత్తగూడెం జిల్లాలో నిర్వహించిన ట్రయల్‌ రన్‌ కీలక మైలురాయిగా నిలిచింది. తొలుత అశ్వారావుపేట నియోజకవర్గం ముల్కలపల్లి మండలం పూసుకుడెం వద్ద సీతారామ సాగర్‌ ప్రాజెక్టును సందర్శించిన మంత్రులు, అక్కడ రెండో పంప్‌ హౌస్‌ ట్రయల్‌ రన్‌ను ప్రారంభించారు. అనంతరం ముల్కలపల్లి మండలం కమలాపురం గ్రామానికి వెళ్లి మూడో పంప్‌హౌస్‌ ట్రయల్‌ రన్‌ను ప్రారంభించారు. ఖమ్మం జిల్లా వైరాలో ఆగస్టు 15న ప్రాజెక్టు ప్రారంభోత్సవం సందర్భంగా ముఖ్యమంత్రి ప్రసంగించనున్న బహిరంగ సభ ఏర్పాట్లను పరిశీలించారు. 2026 ఆగస్టు నాటికి సీతారామ ప్రాజెక్టు కింద ప్రతి ఎకరాకు సాగునీరు అందించేందుకు ప్రభుత్వం కట్టుబడి ఉందని నీటి పారుదల, పౌర సరఫరాల శాఖ మంత్రి ఉత్తమ్‌ కుమార్‌ రెడ్డి స్థానికంగా నిర్వహించిన విలేకరుల సమావేశంలో తెలిపారు. ‘సీతారామ లిఫ్ట్‌ ఇరిగేషన్‌ ప్రాజెక్ట్‌ ఏటా దాదాపు 6 లక్షల ఎకరాలకు సాగునీటికి అందిస్తుందని, ఇది వ్యవసాయ ఉత్పాదకతను పెంచడానికి , రైతుల జీవనోపాధిని మెరుగుపర్చడానికి ఉపయోగపడుతుందన్నారు. 15న ముఖ్యమంత్రి రేవంత్‌రెడ్డి ఈ ప్రాజెక్టును ప్రారంభించడమే కాకుండా.. రైతులకు రూ.2 లక్షల రుణమాఫీ పథకాన్ని ప్రారంభించనున్నట్లు తెలిపారు. ఇది రైతులకు ఎంతో ఉపశమనాన్ని అందించగలదని , వ్యవసాయ అభివృద్ధికి ప్రభుత్వ మద్దతును మరింత బలోపేతం చేయనుందని అన్నారు. గత బిఆర్‌ఎస్‌ ప్రభుత్వాలు అసంపూర్తిగా వదిలేసిన సీతారామ ప్రాజెక్టు ఇప్పుడు కాంగ్రెస్‌ హయాంలో పూర్తయ్యే దశకు చేరుకుందని ఉత్తమ్‌కుమార్‌రెడ్డి పేర్కొన్నారు. వ్యవసాయ అభివృద్ధికి ప్రభుత్వం కట్టుబడి ఉన్నందున ప్రతి ఎకరాకు నీరు చేరేలా నిర్మాణ పనులను వేగవంతం చేయాల్సిన అవసరం ఉందని ఆయన నొక్కి చెప్పారు. గోదావరి రివర్‌ మేనేజ్‌మెంట్‌ బోర్డు ద్వారా పూర్తి ఆమోదం పొందిన సీతారామ లిఫ్ట్‌ ఇరిగేషన్‌ ప్రాజెక్టుకు గోదావరి నది నుండి 67 టిఎంసిల నీరు అందుతుందని ఆగస్టు 2026 గడువులోగా ప్రాజెక్టు పరిధిలోని ప్రతి ఎకరాకు నీరు చేరేలా ఈ కేటాయింపు కీలకమని మంత్రి ఉత్తమ్‌ కుమార్‌ రెడ్డి అన్నారు. ఈ ప్రాజెక్టులో ఏన్కూరు లింక్‌ కెనాల్‌ పేరును రాజీవ్‌ కాలువగా మారుస్తామని ఇది ప్రాంతం అంతటా సాగునీటిని స్థిరీకరించడంలో కీలకంగా ఉంటుందని వివరించారు. పాలేరు ప్రాంతానికి గోదావరి నీటిని తీసుకురావడానికి కీలకమైన యాతలకుంట, జులూరుపాడు టన్నెల్స్‌ వంటి డిస్ట్రిబ్యూటరీ కాలువలు, కీలకమైన మౌలిక సదుపాయాల కల్పనను వేగవంతం చేయాల్సిన అవసరం ఉందని ఉత్తమ్‌ కుమార్‌ రెడ్డి అన్నారు. ప్రాజెక్టు లక్ష్యాలను సకాలంలో చేరుకోవడానికి 3,000 ఎకరాలతో కూడిన ప్యాకేజీ 1, 2 కోసం తక్షణ భూసేకరణ అవసరమని ఆయన వివరించారు. ఈ పనులు పూర్తయితే 3.40 లక్షల ఎకరాలకు సాగునీరు స్థిరీకరించడంతోపాటు అదనంగా 2.60 లక్షల ఎకరాలు సాగులోకి వస్తాయని పేర్కొన్నారు. ప్రాజెక్ట్‌ ప్యాకేజీలు 1 , 2 కోసం అవసరమైన మిగిలిన 1,658 ఎకరాల భూమిని తక్షణమే సేకరించడంపై కీలక దృష్టి సారించామని ఈ ప్యాకేజీలను సకాలంలో పూర్తి చేయడం ద్వారా 3.40 లక్షల ఎకరాలకు సాగునీరు స్థిరీకరించి, సాగునీరు తీసుకురావడానికి ప్రజల సహకరించాలని ఉత్తమ్‌ కుమార్‌ రెడ్డి విజ్ఞప్తి చేశారు. రీ జైనింగ్‌ పేరుతో గత పాలక వర్గం అసమర్థత, వృథా ఖర్చుతో ప్రాజెక్టు వ్యయాన్ని రూ.2,400 కోట్ల నుంచి రూ.18 వేల కోట్లకు పెంచారని మంత్రి పొంగులేటి శ్రీనివాస్‌రెడ్డి విమర్శించారు. దీనికి విరుద్ధంగా, ఖర్చులను అదుపులో ఉంచుకుంటూ అవసరమైన అన్ని అనుమతులు నీటి కేటాయింపులను సాధించడానికి ప్రస్తుత కాంగ్రెస్‌ ప్రభుత్వం చేస్తున్న కృషిని ఆయన ప్రశంసించారు. గత బిఆర్‌ఎస్‌ హయాంలో నిర్లక్ష్యానికి గురైన కీలకమైన అనుమతులు, కేటాయింపులను కాంగ్రెస్‌ ప్రభుత్వం దక్కించుకున్నదన్నారు. 2026 ఆగస్టు నాటికి ప్రాజెక్టును పూర్తి చేస్తామని, తెలంగాణ వ్యవసాయ శ్రేయస్సులో కొత్త శకానికి నాంది పలుకుతామని హామీ ఇచ్చారు. ఈ ట్రయల్‌ రన్‌ కార్యక్రమంలో తెలంగాణ రాష్ట్ర నీటి పారుదల అభివృద్ధి సంస్థ చైర్మన్‌ మువ్వా విజయ్‌ బాబు, ఇరిగేషన్‌ ప్రిన్సిపల్‌ సెక్రటరీ రాహుల్‌ బొజ్జా, భద్రాద్రి కొత్తగూడెం జిల్లా కలెక్టర్‌ జితేష్‌ వి.పటేల్‌, పోలీస్‌ సూపరింటెండెంట్‌ రోహిత్‌ రాజు, ఐటిడిఎ ప్రాజెక్ట్‌ ఆఫీసర్‌ రాహుల్‌ సహా ప్రముఖ అధికారులు పాల్గొన్నారు.
