అద్దంలా రహదారులు

12,751 గ్రామపంచాయతీలకు బిటి రోడ్లు వేయాలి
రోడ్ల పరిస్థితిపై ముఖ్యమంత్రి కెసిఆర్‌ సమీక్ష

ప్రజాపక్షం / హైదరాబాద్‌ : రానున్న రెండేళ్లలో రాష్ట్రంలోని రహదారులన్నీ అద్దంలా మార్చాలని ముఖ్యమంత్రి కె.చంద్రశేఖర్‌రావు అధికారులను ఆదేశించారు. నీటి పారుదల ప్రాజెక్టుల నిర్మాణం తర్వాత ప్రభుత్వం రహదారులకే ప్రాధాన్యం ఇస్తుందని స్పష్టం చేశారు. కొత్తగా ఏర్పాటైన గ్రామ పంచాయతీలతో సహా, రాష్ట్రంలోని మొత్తం 12,751 గ్రామ పంచాయతీలకు బిటి రహదారి సౌకర్యం కల్పించాలని ఆదేశించారు. ప్రస్తుతం రహదారుల పరిస్థితి ఎలా ఉంది? వాటిని మెరుగుపర్చడానికి ఏం చేయాలి? అనే విషయంపై ప్రణాళిక రూపొందించాలని సిఎం అధికారులకు చెప్పారు. దీనికి అవసరమైన బడ్జెట్‌ కేటాయించడానికి ప్రభుత్వం సిద్ధంగా ఉందని ఆయన వెల్లడించారు. రాష్ట్రంలో రహదారుల పరిస్థితిపై ముఖ్యమంత్రి కెసిఆర్‌ శనివారం ప్రగతి భవన్‌లో సంబంధిత అధికారులతో సమీక్ష నిర్వహించారు. ముఖ్య కార్యదర్శులు సునిల్‌ శర్మ, రామకృష్ణ రావు, రోడ్లు, భవనాల (ఆర్‌ అండ్‌ బి) శాఖ ఇఎన్‌సి గణపతిరెడ్డి, ఎస్‌ఇ చంద్రశేఖర్‌, సిఎంఓ అధికారులు స్మితా సభర్వాల్‌, రాజశేఖర్‌ రెడ్డి తదితరులు పాల్గొన్నారు. ఈ సందర్భంగా ముఖ్యమంత్రి మాట్లాడుతూ తెలంగాణ రాష్ట్రం ఏర్పడిన తర్వాత కేంద్రం ద్వారా రికార్డు స్థాయిలో జాతీయ రహదారులు సాధించుకున్నామని, రాష్ట్రంలో ఆర్‌ అండ్‌ బి, పంచాయితీ రాజ్‌ శాఖల ఆధ్వర్యంలో పెద్దఎత్తున రోడ్ల నిర్మాణం చేపట్టామని చెప్పారు. ఇంకా రాష్ట్రంలో అవసరమైన చోట రహదారులకు మరమ్మతులు చేయాలని, శిథిలావస్థకు చేరిన బ్రిడ్జిలకు మరమ్మతులు చేయాలని, ఇరుకు బ్రిడ్జిలను వెడల్పు చేయాలని సిఎం చెప్పారు. దీనికోసం ఇఎన్‌సి స్థాయి నుంచి ఎఇ స్థాయి వరకు రాష్ట్ర స్థాయి ఆర్‌ అండ్‌ బి అధికారుల సదస్సు నిర్వహించాలని చెప్పారు. గ్రామ స్థాయి నుంచి ప్రతీ రోడ్డు పరిస్థితిని సమీక్షించి, తీసుకోవాల్సిన చర్యలపై ప్రణాళిక రూపొందించాలని కోరారు. ఏ జిల్లా, ఏ మండలం అనే తేడా లేకుండా, అక్కడ ఏ పార్టీ ప్రజాప్రతినిధి ప్రాతినిధ్యం వహిస్తున్నారనే విషయం పక్కన బెట్టి, ఎక్కడ అవసరం ఉంటే అక్కడ రోడ్ల మరమ్మతులు చేపట్టాలని ఆదేశించారు. స్థానిక ఎమ్మెల్యేలు, ప్రజా ప్రతినిధులు కూడా రోడ్ల మరమ్మతు పనులను చేయించుకోవాలని కెసిఆర్‌ సూచించారు. పంచాయతీ రాజ్‌ నుంచి ఆర్‌ అండ్‌ బికి, ఆర్‌ అండ్‌ బి నుంచి జాతీయ రహదారులకు రోడ్లు బదిలీ అయిన సందర్భంలో, వాటి నిర్వహణ, మరమ్మతుల పట్ల నిర్లక్ష్యం వహిస్తున్నారని సిఎం అసంతృప్తి వ్యక్తం చేశారు.

DO YOU LIKE THIS ARTICLE?